Giaprubahan sa Sangguniang Panlungsod sa Malaybalay ang usa ka resolusyon nga naghatag og autorisasyon kang City Mayor Jay Warren R. Pabillaran sa pag-isyu sa Letter of No Objection (LONO) ngadto sa Aqua de Oro Resources, Inc. alang sa gisugyot niining ₱2-bilyon nga bulk water supply program atol sa ika-69th Regular Session kagahapon, Nobyembre 10, 2026.
Gipresentar ni City Councilor Niko Aldeguer, chairman sa Committee on Public Works and Utilities, nga ang maong unang yugto sa proyekto maglangkob sa augmentation sa deep wells sulod sa upat ka bulan ug pagpataod og mga bag-ong pipelines aron maabtan sa tubig ang mga dapit nga wala pa maserbisyohan sa local water district.
Gipatin-aw sa konseho nga ang maong LONO dili absolute ug limitado lamang alang sa initial phase sa kumpanya, samtang gikinahanglan gihapon niini ang pagtuman sa mga regulasyon sa National Water Resources Board (NWRB), Environmental Compliance Certificate (ECC), ug mga lokal nga ordinansa.
Giisip kini nga lakang aron masiguro nga maayo ug sakto ang ipahigayong feasibility study sa dili pa hingpit nga makapadayon ang Aqua de Oro sa ilang medium-term ug long-term nga mga plano sa paghatag og limpyong tubig sa dakbayan sa Malaybalay.
Photo courtesy: SP/Malaybalay City
