Makadawat og katugbang sa usa ka buwang sweldo ug ₱5,000 nga cash gift ang mga kwalipikadong kawani sa gobyerno human maggahin ang Department of Budget and Management (DBM) og kinatibuk-ang ₱82.9 bilyon alang sa ilang year-end benefits. Gibahin ang maong dakong pondo ngadto sa ₱73.449 bilyon alang sa year-end bonus ug ₱9.549 bilyon alang sa cash gift.
Sumala kang DBM Secretary Kim Robert C. De Leon, gipagawas na sa ilang departamento ang pondo ngadto sa nagkadaiyang ahensya sa gobyerno ug gipaabot nga madawat kini sa mga kawani kauban sa ilang unang suweldo karong Nobyembre.
Kwalipikado nga makadawat sa maong benepisyo ang mga kawani nga nakatrabaho og labing menos upat ka bulan o 120 ka adlaw gikan Enero 1 hangtod Oktubre 31, 2026, sa national man o local government unit.
Gipasiugda pa ni De Leon nga dakong tabang ang maong bonus ug cash gift sa mga kawani ug sa ilang mga pamilya, ilabi na karong nagkaduol na ang panahon sa Pasko. Ang maong lakang nagsilbi usab nga pag-ila ug paghatag og pagtagad sa ilang walay puas nga kakugi, dedikasyon, ug gipakita nga serbisyo publiko sa tibuok nasod.
Photo courtesy: Department of Budget and Management
