Patay ang usa ka lalaki human giingong gidunggab sa walo ka higayon sa duha ka suspek sa may alas 4:30 sa hapon niadtong Nobyembre 8, 2026 sa Sitio Malinawon, Barangay Rogongon, Iligan City.
Subay sa report sa Iligan City Police Station 6 (ICPS6) adunay nahitabong lalis tali sa silingan ug sa duha ka suspek nga parehong hingkod ang pangedaron ug mga residente sa maong lugar.
Nasayran, nga nisulay og ulang ang biktima aron pakalmahon ang nahitabong lalis apan kalit kining giluba sa duha ka suspek gamit ang hait nga hinagiban nga gitawag og “Plamingco”.
Isip resulta, nakaangkon ang biktima og walo (8) ka samad dinunggaban partikular sa ibabaw nga bahin sa lawas, duha (2) ka samad sa likod, ug lima (5) ka samad sa wala nga kamot.
Human sa pagpangdunggab, daling nikalagiw ang mga responsible ngadto sa wala mahibalhing direksyon dala ang gigamit nga hinagiban.
Dihadiha nagpahigayon ang mga kapulisan og hot pursuit operation aron masubay ug madakpan ang mga suspek nga miikyas human sa insidente.
Sa pagkakaron, ang patayng lawas sa biktima gidala sa Mara Venus Funeral Homes alang sa tukmang lamay samtang ang pamilya desidedong mopasaka og kaso sa mga responsable.
