Nadakpan sa kapulisan ang usa ka suspek sa pagpangawat og motorsiklo sa Polomolok, South Cotabato, atol sa koordinadong operasyon sa Barangay San Vicente, Banga, pasado alas 2:50 sa kadlawon niadtong Oktubre 27, 2026. Giila ang nadakpan nga si alyas Bullet, samtang nagpadayon ang pagpangita sa iyang mga kauban.
Base sa report, nahitabo ang motornapping pasado alas 1:40 sa kadlawon sa Purok Masaya, Barangay Magsaysay, Polomolok. Gikatahong gisulod sa tulo hangtod lima ka lalaki ang compound sa pamilya sa biktimang si alyas Ronald, 22 anyos, ug gidala ang Kawasaki KLX 150 sa iyang amahan. Sa pagsulay sa biktima nga gukdon ang mga suspek, gipusil siya apan wala maigo.
Sa koordinadong dragnet operation, na-intercept sa kapulisan ang duha ka motorsiklo sa Purok Candijay, Sitio Valencia, Barangay San Vicente, Banga. Misulay og ikyas ang mga sakay niini, apan usa ang nadakpan. Narekober sa operasyon ang kinawat nga Kawasaki KLX 150, Yamaha Aerox 155, usa ka .357-caliber pistol nga adunay lima ka buhing bala, usa ka basyo sa bala, usa ka MK2 fragmentation grenade ug duha ka sachet sa gidudahang shabu nga mitimbang og 2.34 gramos, nga gibanabanang nagkantidad og ₱15,912.
Anaa na sa kustodiya sa Banga Municipal Police Station ang nadakpang suspek samtang giandam ang tukmang mga kaso batok kaniya. Padayon usab ang imbestigasyon ug pagpangita sa ubang nalambigit sa insidente aron sila madakpan ug maatubang sa hustisya.
Photo courtesy: Shutterstock
