Nagkampeon sa ikatulong higayon ang pamilya Ofong sa Barangay Lamdalag, Lake Sebu sa 2026 Search for Most Outstanding Indigenous Peoples (IP) Model Family sa South Cotabato. Ang pamilya nila Mariano ug Bernadeth Ofong maoy nakakuha sa kinatas-ang ebalwasyon tungod sa ilang maayong pamatasan isip pamilya, paglahutay sa mga hagit sa kinabuhi ug pagpanalipod sa kultura ug kabilin sa mga lumad.
Gipahigayon ang awarding ceremony niadtong Oktubre 25 sa South Cotabato Gymnasium and Cultural Center sa Koronadal City, diin nadawat sa pamilya Ofong ang P50,000.00 nga premyo ug tropeyo.
Gipahinungod ni Vilma Grace Tabidad Ofong, kinsa mirepresentar sa ilang pamilya, ang kadaugan ngadto sa ilang komunidad ug sa tanang misuporta kanila. Matod pa niya, dili lamang kini kadaugan sa ilang pamilya kondili garbo usab sa ilang komunidad ug kultura.
Misalmot sa kompetisyon ang unom ka pamilya gikan sa Lake Sebu, T’boli, Polomolok, Norala, Tupi ug Banga, nga nagpakita sa ilang mga kasinatian sa panginabuhi, edukasyon, pagpadako sa mga anak ug pagpreserbar sa mga tradisyon sa ilang kaliwatan.
Nakuha sa pamilya Damfung sa T’boli ang unang runner-up ug 30 mil pesos nga premyo, samtang ang pamilya Dalama sa Polomolok maoy ikaduhang runner-up ug nakadawat og 20 mil pesos. Nakuha usab sa pamilya Dalama ang special awards nga Most Viewed Family Video ug Most Smart Family Portfolio.
Samtang, ang ubang mga pamilyang misalmot nga wala makadaog sa nag-unang mga pasidungog nakadawat og tig-10 mil pesos nga consolation prize.
Matod ni Provincial Population Officer Melanie C. Chiva, importante ang maong kalihokan aron mailhan ang papel sa mga pamilya sa paghulma sa responsableng mga indibidwal ug pagtukod og lig-on nga komunidad.
Gidasig usab niya ang mga ginikanan ug lider sa mga lumad nga hatagan og prayoridad ang edukasyon, responsableng pagginikanan ug pagpanalipod sa mga kabataan batok sa sayong kaminyoon ug pagbusong sa tin-edyer.
Gipasiugda usab ang Republic Act No. 11596 o balaod nga nagdili sa child marriage. Kabahin ang maong kalihokan sa ika-11 Provincial Indigenous Peoples’ Day ug Kakle Festival 2026 sa South Cotabato, nga nagtumong sa pagpasidungog sa kultura sa mga lumad ug pagdasig sa mga pamilya nga ipadayon ang ilang mga tradisyon.
Gisugdan ang kinatibuk-ang Search for Model Family sa South Cotabato niadtong 1995, samtang ang espesyal nga kompetisyon alang sa Indigenous Peoples Model Family gisugdan niadtong 2016 pinaagi sa provincial ordinance nga gisulat ni kanhi Indigenous Peoples Mandatory Representative Edgar Sambog.
Ang edisyon karong 2026 maoy ika-napulo na ka tuig sa maong pagpangita sa mga pamilyang lumad nga mahimong ehemplo sa maayong pagkinabuhi, lig-on nga panaghiusa ug pagpreserbar sa kultura.
Photo courtesy:PLGU South Cotabato
