Gipahigayon ang Oplan Harabas Undas 2026 sa Dipolog City Integrated Bus Terminal nga nahimutang sa Barangay Sta. Isabel, Dipolog City, Zamboanga del Norte kagahapong adlawa Huwebes, Oktubre 29, 2026, aron masiguro ang kaluwasan sa publiko ilabi na sa mga pasahero atol sa Undas.
Gipangulohan sa Philippine Drug Enforcement Agency (PDEA) ang maong kalihokan, kauban ang Philippine National Police (PNP), Land Transportation Office (LTO) ug Highway Patrol Group (HPG). Samtang mihatag usab sa ilang supporta ang Provincial Government ug sa Local Government Unit (LGU) sa Dipolog alang sa mga galamiton ug uban pang gikinahanglan sa maong operasyon.
Sumala pa ni PDEA Zamboanga del Norte Provincial Officer IA V Ariel Escudero, tumong sa Oplan Harabas ang pagpalig-on sa kaluwasan sa mga pasahero pinaagi sa drug testing sa mga public utility vehicle drivers aron masuta kung angayan ba silang magmaneho sa mga pampasaherong sakyanan.
Dugang ni Escudero, kon adunay drayber nga magpositibo sa paggamit sa gidiling droga, aduna’y mga pamaagi ang gobyerno aron matabangan kini nga makalikay sa maong bisyo ug makabalik sa iyang trabaho, subay sa angay nga proseso.
Samtang, mibutyag si PGSO Head Engr. Dioscoro G. Endab nga kabahin ang maong programa sa mga lakang nga gipaluyohan sa gobernador sa probinsya aron mapanalipdan ang katawhan batok sa paggamit sa ilegal nga droga.
Gipadayag usab ni Cosairi Maniri, Transportation Regulation Officer 1 sa Land Transportation Office (LTO), nga pinaagi sa maong kalihukan masiguro nga ang mga drayber sa pampasaherong sakyanan wala nagmaneho ubos sa impluwensya sa gidiling droga, alang sa kaluwasan sa mga pasahero.
Nanawagan ang PDEA sa publiko, ilabi na sa mga drayber, nga likayan ang paggamit sa gidiling droga tungod kay mahimo kining hinungdan sa kadaot ug problema dili lamang sa pamilya kondili usab sa tibuok komunidad.
