Nakakumpiska ang Zamboanga del Norte Police Provincial Office o ZNPPO og gidudahang ilegal nga droga nga mokabat sa ₱439,000 gikan sa unom ka mga suspetsado atol sa gipahigayong lima ka operasyon sulod sa usa ka semana, gikan Oktubre 19 hangtod 25, 2026.
Base sa report sa ZNPPO, miabot sa 64.63 gramos ang kinatibuk-ang gibug-aton sa gituohang shabu nga nakumpiska, nga adunay gibanabanang kantidad nga ₱439,484. Ang mga operasyon gipahigayon sa Provincial Drug Enforcement Unit o PDEU, Dipolog City Police Station ug Labason Municipal Police Station.
Gidayeg sa ZNPPO ang mga personahe sa maong mga yunit tungod sa ilang paningkamot sa kampanya batok sa ilegal nga droga ug sa pagpanalipod sa kaluwasan sa katawhan sa probinsya.
Sumala ni PCOL Reydante E. Ariza, Provincial Director sa ZNPPO, nagpakita ang maong resulta sa dedikasyon ug pagbantay sa mga personahe sa kapulisan sa pagpugong sa ilegal nga droga ug pagpanalipod sa kaayohan sa mga residente sa Zamboanga del Norte.
Gipasalig sa ZNPPO nga ipadayon ang ilang kampanya batok sa ilegal nga droga. Giawhag usab ang publiko nga ipaabot sa mga awtoridad ang bisan unsang impormasyon kalabot sa maong kalihokan pinaagi sa hotline nga 0998-598-6764 o sa 911.
Photo courtesy: Zamboanga del Norte Police Provincial Office
