Gisugdan na ang pagpangandam alang sa unang Provincial Coffee Festival sa Surigao del Sur nga planong ipahigayon sa lungsod sa Tagbina. Gipahigayon niadtong nakalabay nga adlaw, ang panagtigom sa mga nagkalainlaing opisina sa probinsya ug lungsod aron hisgutan ang mga plano ug preparasyon alang sa maong festival.
Mitambong sa maong tigom ang mga representante gikan sa Provincial Coffee Industry Council, Provincial Investment Promotion Office, Provincial Planning and Development Office (PPDO), Municipal Agriculture Office, Municipal Tourism Office ug Local Economic Development and Investment Promotion Office (LEDIPO).
Isip Coffee Capital of Surigao del Sur, gilauman nga mahimong dakong higayon alang sa Tagbina ang festival aron ipaila ug ipakita ang coffee culture, local products, tourism destinations, ug talento sa coffee farmers ug local MSMEs
Pinaagi sa maong kalihukan, gilauman nga mapalambo ang coffee tourism ug mas mailhan ang Tagbina isip usa ka destinasyon nga adunay daghang lokal nga produkto, kultura ug mga kasinatian nga mahimong madiskobrehan sa mga turista.
Sa pagkakaron, wala pa ipahibalo ang eksaktong petsa sa ipahigayon nga unang Provincial Coffee Festival.
Photo courtesy: LGU Tagbina
