Kapin sa ₱297,000 nga kantidad sa gituohang shabu ang nasakmit sa kapulisan atol sa operasyon batok sa ilegal nga droga sa Barangay Parang, lungsod sa Cantilan, Surigao del Sur niadtong nakalabay nga adlaw.
Usa ka 34-anyos nga lalaki nga giila lamang sa alyas nga “Rafael” ang nadakpan sa mga operatiba sa Cantilan Municipal Police Station (MPS) pinaagi sa pagpatuman sa search warrant nga giisyu sa Regional Trial Court, Branch 41 sa Cantilan.
Sumala sa Police Regional Office 13 (PRO-13), mokabat sa 43.87 gramos nga gituohang shabu, nga nagkantidad og ₱297,704, ang nasakmit atol sa maong operasyon.
Narekober usab gikan sa suspek ang 17 ka pakete sa gituohang shabu nga gisulod sa gagmayng plastik, lakip ang uban pang mga gamit nga may kalabotan sa ilegal nga droga.
Ang nadakpang suspek ug ang mga nakumpiskang ebidensiya gidala na sa Cantilan MPS alang sa dokumentasyon ug hustong pagproseso sa kaso. Giatubang usab sa suspek ang angay nga kasong may kalabotan sa paglapas sa Republic Act No. 9165 o Comprehensive Dangerous Drugs Act of 2002.
Photo courtesy: PRO 13
