Gipasiugda sa Davao Norte Police Provincial Office (DNPPO) ang papel sa kapulisan sa pagpanalipod sa kababayen-an, kabataan ug mga pamilya atol sa National Filipino Family Day Celebration niadtong milabay’ng adlaw.
Gipahigayon ang kalihokan sa Bulwagan ng Karunungan Hall, Capitol Compound sa Barangay Mankilam, Tagum City, diin mitambong ang DNPPO ubos sa pagpangulo ni Provincial Director PCOL Glenn Cristines, pinaagi sa Provincial Women and Children Protection Desk (PWCPD).
Kabahin sa kalihokan ang OPLAN PAGKILALA – Search for Best WCPD Station 2026, nga nagtumong sa pag-ila sa mga police unit nga nagpakita og dedikasyon, pasalig ug maayong performance sa pagpanalipod sa kababayen-an ug kabataan, lakip ang paghatag og hustong serbisyo sa mga biktima sa gender-based violence.
Gipangulohan ni PMAJ Eunice Huit, ang Chief sa PWCPD, uban sa mga personnel sa Women and Children Protection Desk (WCPD) ug FJGAD ang pag-apil sa maong selebrasyon.
Gipili isip mga outstanding WCPD units sa DNPPO ang Sto. Tomas Municipal Police Station isip Class A samtang Class B sab ang New Corella Municipal Police Station, ug Class C ang Talaingod Municipal Police Station.
Gipasalamatan usab ang tanang partisipanteng WCPD stations tungod sa ilang padayong serbisyo ug paningkamot sa pagpanalipod sa mga pamilya.
Photo Courtesy: DNPPO
