Gideklarar na ubos sa State of Calamity ang tibuok probinsya sa Agusan del Sur tungod sa dakong kadaot nga gipahinabo sa El Niño, lakip na ang epekto niini sa agrikultura ug kakulang sa suplay sa tubig nga mainom.
Pinaagi sa Resolution No. 585-26 nga giaprobahan niadtong Septiyembre 24, 2026, gisagop sa Sangguniang Panlalawigan sa Agusan del Sur ang rekomendasyon sa Provincial Disaster Risk Reduction and Management Council (PDRRMC) nga ideklarar ang probinsya ubos sa State of Calamity.
Base sa resolusyon, mokabat sa 36.4 porsiyento sa kinatibuk-ang mga produktong pang-agrikultura sa probinsya ang naapektuhan sa El Niño.
Dugang pa niini, halos tanang lokal nga kagamhanan sa Agusan del Sur nakasinati na usab og kakulang sa suplay sa tubig nga mainom, samtang natala ang average nga 31.4 porsiyentong pagkunhod sa suplay sa tubig sa mga watershed.
Gikonsiderar usab sa Sangguniang Panlalawigan ang padayon nga pagsaka sa temperatura ug ang dakong epekto sa hulaw sa panginabuhian sa mga mag-uuma ug uban pang sektor.
Subay sa Memorandum Order No. 60, Series of 2019, mahimong ideklarar ang usa ka probinsya ubos sa State of Calamity kon labing menos 30 porsiyento sa panginabuhian sa sektor sa agrikultura, negosyo ug industriya ang naapektuhan, o kon adunay pagkaputol sa mga importanteng serbisyo nga dili mapasig-uli sulod sa usa ka semana.
Pinaagi sa maong deklarasyon, gilauman nga mapadali ang paghatag og tabang ug ang paghimo sa mga lakang aron matubag ang epekto sa El Niño sa probinsya.
Photo courtesy: Provincial Government of Agusan del Sur
