Giturn-over ngadto na sa buhatan sa department of Environment and Natural Resources Office ang usa ka matang sa juvenile Brahminy Kite o Haliastur indus human nga narescue sa Barangay Polonuling, Tupi, South Cotabato kaniadtong milabayng adlaw.
Kahibaluan nga Nadiskubrehan ang maong langgam sa usa ka residente ug gilayon niining gitugyan sa Municipal Environment and Natural Resources Office kon MENRO-Tupi. Dayon gihatud ngadto sa Protected Area Management Office of Mt. Matutum Protected Landscape nga maoy nakig-coordinate sa Conservation and Development Division o CDD sa DENR Region XII alang sa turnover.
Base sa assessment ang Brahminy Kite gibana-banang mitimbang sa 350 gramos ug adunay gitas-on nga 47 sentimetros. Brown ang kolor sa balhibo niini ug namatikdan usab ang mga balhibo nga naputol.
Gikatakdang dad-on ang langgam ngadto sa Regional Wildlife Rescue Center o RWRC sa Lutayan, Sultan Kudarat, alang sa mas lawom nga physical assessment ug evaluation aron matino ang gikinahanglang rehabilitation niini.
Matud pa nga dakong papel ang community participation ug koordinasyon tali sa nagkadaiyang ahensya sa pagpanalipod sa mga wildlife.
Gipahinumdoman usab sa DENR Region 12 ang publiko nga kong makakita sama niining mga wild animals nga nasamdan kinahanglan kini i-report sa labing duol nga DENR office, protected area office ug local environment and natural resources office aron nga marespondihan.
