Nadakpan sa mga kapulisan ang Unom ka wanted persons sa Surigao del Norte atol sa gilusad nga sunod-sunod nga warrant operations. Kini kabahin sa padayong Kampanya batok sa mga pinangita sa balaod sa Surigao del Norte Police Provincial Office o SDNPPO batok sa mga adunay pending nga kaso sa korte.
Matud kang Provincial Director PCOL Warren E. Dablo, tulo sa mga nadakpan mga residente sa Buenavista, Dapa, Surigao del Norte ug gikasuhan og paglapas sa Presidential Decree 705 o Revised Forestry Code of the Philippines.
Ang warrant batok kanila gipagawas niadtong Enero 7, 2019 sa Regional Trial Court Branch 41 sa Cantilan, Surigao del Sur, diin adunay gitugot nga piyansa sa kantidad nga P40 mil pesos matag usa.
Laing 29-anyos nga babaye nga negosyante, ang nadakpan tungod sa kaso Republic Act 10175 o Cybercrime Prevention Act of 2012. Usa ka 33-anyos nga lalaki gikan sa San Isidro, Surigao del Norte ang giaresto tungod sa kaso Republic Act 7610, nga adunay gitugot nga piyansa P200 mil pesos.
Nasikop usab ang 55-anyos nga karpintero ug residente sa Claver, Surigao del Norte, nga giatubang ang kaso Republic Act 9262 o Anti-Violence Against Women and Their Children Act of 2004.
Matud ni PCOL Dablo, padayon ang kampanya sa pagdakop sa mga wanted persons, samtang ang unom ka nadakpan anaa na karon sa kustodiya sa tagsa-tagsa ka Municipal Police Station alang sa tukmang disposisyon.
