Patay ang usa ka 50 anyos nga babaye human gitigbas sa iyang silingan nga lalaki sa Purok 4, Barangay Libertad, Dumingag, Zamboanga del Sur, nga las 9:30 sa buntag, Oktubre 2, 2026.
Ang biktima ug suspetsado managsilingan diin segun sa imbestigasyon naglalis una ang duha bahin sa usa ka bahin sa wala pa nagaling nga humay nga anaa sa solar dryer. Sa dihang nipauli na unta ang biktima, natagboan niini ang suspetsado nga giingong nagdala ug sundang nga kalit nanigbas sa nidagan unta nga biktima.
Naka-angkon ug grabeng samad sa liog ang biktima ug wala na nadala pa sa balay tambalanan gumikan kay nabugtuan na kini sa iyang hinulamang kinabuhi.
Human sa panghitabo, nisibat ang suspetsado paingon sa Barangay Maralag diin padayon pa usab nga gipangita karon sa kapulisan alang sa posibleng pagdakop niini.
Photo courtersy: ZSPPO
