Nasikop ang 19 anyos nga vendor atol sa entrapment operation batok sa pagbaligya og smuggled cigarettes sa Pantalan II, Barangay Taft, Surigao City, alas 10:00 sa buntag.
Gipangulohan ang operasyon sa Surigao City Police Station-Drug Enforcement Unit, kauban ang 1st Surigao del Norte Provincial Mobile Force Company ug Provincial Intelligence and Targeting Section sa Surigao del Norte-RIU13.
Nalit-ag ang suspek sa aktong pagbaligya sa smuggled cigarettes ngadto sa poseur buyer, nga taga Springville B, Barangay Luna, ning dakbayan sa Surigao.
Nakumpiska gikan kaniya ang duha ka ream sa Champion Black Menthol nga napalit sa poseur buyer, dugang pa ang 29 ka ream nga Champion Black Menthol, lima ka ream Aris, lima ka ream Castorce, ug siyam ka ream Modern cigarettes.
Gibanabana nga mokabat sa 24 mil pesos ang kinatibuk-ang kantidad sa mga nakumpiskang sigarilyo, nga gibana-banang 500 pesos kada ream, lakip ang usa ka libo ka pesos nga marked money.
Ang operasyon kabahin sa pagpatuman sa Republic Act No. 10643 o ang Graphic Health Warnings Law.
Ang suspek, lakip ang mga nakumpiskang sigarilyo ug uban pang ebidensya, anaa na sa kustodiya sa Surigao City Police Station alang sa hustong disposisyon.
Photo courtesy: Jun Parada
