Nanumpa ang 192 ka bag-ong appointed ug promoted nga empleyado sa LGU-San Carlos City niadtong Septiyembre 17 sa City Hall Annex Building.
Gipanguluhan ni Mayor Renato Y. Gustilo ang panumpa sa 175 ka empleyado sa Executive Branch, samtang gipangunahan ni SP Member ug OIC sa Office of the City Vice Mayor Rommel T. Debulgado ang panumpa sa 17 ka empleyado sa Legislative Branch.
Gipunting ni Gustilo nga ang ilang bag-ong posisyon dili lamang pribilehiyo, kundili mas dako nga responsibilidad sa pagserbisyo sa katawhan. Iyang gihatagan og kredito ang mga empleyado ug department heads sa walo ka sunod-sunod nga Seal of Good Local Governance o SGLG awards sa siyudad.
Samtang, Gipahimangnuan ni Debulgado nga bisan asa nga opisina sila na-assign, usa gihapon sila ka City Government nga adunay tumong nga mahatagan og maayong serbisyo ang mga taga-San Carlos.
Gihimug-atan usab ni CSC Field Office-Bacolod City Director II Atty. Phillip Bernard H. Capadosa nga kauban sa appointment ug promotion ang responsibilidad sa pagpadayon sa maayong performance, integridad ug dedikasyon sa serbisyo publiko.
Ang oath-taking kabahin sa 126th Philippine Civil Service Anniversary nga adunay tema nga “Bawat Kawani, Lingkod Bayani: Puso, Dangal, at Galing Para sa Bayan.”
Photo Courtesy: San Carlos City, Neg. Occ. -LGU Information Page
