Usa lang ka insidente sa sunog ang naitala sa Municipalidad sa Maitum, Sarangani Province, sa tibuok bulan sa Agosto. Sumala sa Bureau of Fire Protection o BFP-Maitum, usa ka balay ang nasunog human misilaob ang kalayo sa stockpile sa dried bamboo, diin naapektuhan ang portion sa atop sa maong balay.
Gipatin-aw ni FO1 Joemarie Quilajano, Fire Investigator sa BFP-Maitum, nga kasagarang hinungdan sa mga sunog nga ilang natala mao ang mga man-made o hinimo sa tawo nga hinungdan.
Lakip niini ang biniyaan o walay pagdumala nga pagluto gamit ang kahoy, uling o LPG, ingon man ang pagsunog sa basura. Gipahinumdoman sa BFP ang publiko nga magmatngon sa paggamit sa kalayo, ilabina panahon sa pagluto, ug siguruhon nga hingpit nga mapalong ang kalayo human gamiton.
Gipasiugda usab ang hustong pagtipig sa mga dali masunog nga materyales sama sa uga nga kawayan, kahoy ug uban pang combustible materials, ug ipahilayo kini sa mga tinubdan sa kalayo aron malikayan ang pagdako sa sunog.
