Nakadawat og nagkadaiyang pasidungog ang San Carlos City tungod sa mga nahimong kalampusan sa turismo ug performance sa kapulisan, nga nagpakita sa padayong paningkamot sa lokal nga pangagamhanan ug mga ahensya sa pagpalambo sa serbisyo publiko.
Gipresentar sa San Carlos City Tourism Office kang Mayor Renato Y. Gustilo niadtong Septiyembre 14 ang mga awards nga nadawat sa siyudad atol sa 26th Tourism Provincial Week Celebration, lakip ang Grand Winner sa Photo Contest, 2nd Runner-Up sa Best Tourism Brochure, 2nd Placer sa Best LGU Tourism Vlog, ug 2nd Runner-Up sa Tour Guiding Competition.
Sa laing bahin, nakadawat usab og pasidungog ang San Carlos City Police Station human makab-ot ang *Rank No. 2 sa Regional Operations Accomplishment Dashboard* alang sa Agosto 2026. Gipresentar ni Police Lieutenant Colonel Nazer P. Canja kang Mayor Gustilo ang maong recognition isip pag-ila sa maayong performance sa estasyon atol sa maong assessment.
Gipasidunggan usab ni Canja ang tibuok kapulisan sa siyudad tungod sa maong kalampusan, nga giingong resulta sa hiniusang paningkamot, disiplina, ug maayong pagpatuman sa ilang mga katungdanan
Photo Courtesy: San Carlos City, Neg. Occ. LGU Information Page
