Gipahigayon sa Zamboanga Sibugay Provincial Capitol ang programa nga “Handog ng Pangulo: Serbisyong Sapat Para sa Lahat,” isip kabahin sa mga kalihukan atol sa adlawng natawhan sa Presidente. Tumong sa maong kalihukan ang pagdala sa nagkadaiyang serbisyo ug tabang sa gobyerno mas duol ngadto sa mga katawhan.
Usa sa mga benepisyaryo mao ang 1,500 ka mga residente sa Zamboanga Sibugay nga nakadawat og bugas. Matag usa kanila gihatagan og 10 ka kilo nga bugas, nga usa sa mga tabang nga gipanghatag isip kabahin sa programa.
Gawas sa ayuda alang sa mga pamilya, gipasiugda usab sa maong kalihukan ang suporta ngadto sa Micro, Small and Medium Enterprises o MSMEs. Nagkadaiyang tabang ug serbisyo ang giturn-over ngadto sa mga MSMEs pinaagi sa nagkadaiyang ahensya sa national government aron makatabang sa ilang operasyon ug pagpalambo sa panginabuhian.
Pinaagi sa “Handog ng Pangulo,” gipakita ang koordinasyon sa nagkadaiyang ahensya sa gobyerno sa paghatag og serbisyo nga direktang maabot sa mga Sibugaynons. Gilauman nga ang maong mga programa makahatag og dugang nga suporta sa mga pamilya ug mga gagmay nga negosyante sa probinsya.
