Arestado ang usa ka 41-anyos nga tricycle driver nga giila sa alyas “Kurt,” human masikop sa buy-bust operation sa mga otoridad niadtong nakalabay nga adlaw, sa Barangay Apopong, General Santos City.
Nakuha gikan sa suspek ang kapin 62.93 gramos nga gituohang shabu nga gibana-banang mokantidad og ₱427,924. Ang operasyon gipahigayon sa City Police Drug Enforcement Unit o CPDEU, inubanan sa City Intelligence Unit ug Police Station 2 sa GSCPO.
Matud sa kapulisan, usa ka sachet nga adunay gibana-banang 0.16 gramos nga gituohang shabu ang gibaligya sa suspek ngadto sa police poseur-buyer kapalit sa ₱1,000. Human niini, nakuha pa sa body search ang 20 ka sachet sa gituohang shabu, lakip ang cellphone, kwarta, mga dokumento, sigarilyo, lighter ug marked money.
Gidala na ang mga nakumpiskang droga ngadto sa General Santos City Forensic Unit 12 alang sa laboratory examination, samtang ang suspek anaa na sa kustodiya sa Police Station 2 sa GSCPO. Giatubang sa suspek ang kasong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002, nga giandam na alang sa pagsumiter pinaagi sa inquest proceedings.
Photo Courtesy: PRO 12
