Napulo ka customized wheelchair ang nadawat sa mga persons with disabilities o PWDs sa Sarangani aron makatabang sa ilang espesyal nga panginahanglan sa paglihok.
Gipangunahan kini sa Provincial Government of Sarangani pinaagi sa Persons with Disability Affairs Office o PDAO, uban sa donasyon nila Charina ug Russell Regallo, mga tag-iya sa Mitsubishi dealership sa General Santos City, ug ilang mga kauban.
Tulo sa napulo ka wheelchair ang giturn-over niadtong September 9 ngadto sa mga benepisyaryo sa Alabel nga sila Sweet Lorelie Ramos, 18; Marileb Bagarinao, 51; ug Analie Campaña, 28.
Sumala kang Alexander Ramos, uyoan ni Sweet Lorelie, dako kini nga tabang aron makagawas-gawas na sa ilang balay ang iyang pag-umangkon, nga kasagarang magpabilin lamang sa duyan gikan sa pagmata hangtod matulog.
Matud ni Disability Affairs Officer II Gretchin Bone, mas nahimong importante ang customized wheelchair ilabi na human sa magnitude 7.8 nga linog niadtong June 8. Labi na kini alang sa mga PWDs nga adunay polio ug multiple disabilities nga nanginahanglan og wheelchair nga tukma sa ilang pisikal nga kahimtang.
Gipahayag ni Bone nga dili lamang kini gamit sa paglihok, kundili usa usab ka suporta aron mas mahimong independent ang mga PWDs ug mas makaapil sa mga kalihokan sa komunidad.
Photo Courtesy: Sarangani PIO
