Patay ang 53-anyos nga driver sa usa ka fish car human kini maaksidente sa may Rotunda, Barangay Dao, Pagadian City, pasado alas-11:35 sa gabii niadtong Sept. 10. Ang biktima giila nga si Edemar, residente sa Manicahan, Zamboanga City, samtang luwas ang iyang pahinante nga si Marlon, 45 anyos, taga-Tampilisan, Zamboanga del Norte.
Base sa inisyal nga imbestigasyon, gikan pa sa Zamboanga City ang fish car ug padulong unta sa Cagayan de Oro City. Apan kalit kining misigzag ug mibangga sa usa ka punoan sa kahoy, diin gituohang nibuto ang ligid sa maong sakyanan.
Naipit ang driver sulod sa sakyanan ug giluwas sa mga rescuers gikan sa PDRRMO, CDRRMO ug BFP Special Rescue Force Region 9. Gidala dayon siya sa tambalanan, apan gideklarang patay sa doktor tungod sa grabeng mga samad. Padayon pa ang imbestigasyon sa kapulisan sa Pagadian aron matino ang eksaktong hinungdan sa aksidente.
