Patay ang duha ka indibidwal samtang usa ang nasamdan sa nahitabong disgrasya mga alas 5:40 sa buntag, September 10, 2026, sa National Highway, Purok Mangga 2, Barangay Lantian, Labangan, Zamboanga del Sur. Nalambigit sa aksidente ang usa ka Mitsubishi Xpander nga gimaneho sa 32-anyos nga lalaki, ug Suzuki Raider 150 nga gimaneho sa wala pa mailhing lalaki.
Base sa inisyal nga imbestigasyon sa Labangan Municipal Police Station ug sa dashcam footage, susama nga gikan sa syudad sa Pagadian paingon sa Barangay Upper Pulacan ang duha ka sakyanan. Gikataho usab nga nagsunod ang Xpander sa Suzuki Raider nga motorsiklo ug kalit lang nibangga sa likod nga bahin sa single motor hinungdan sa disgrasya.
Sa kakusog sa impact, namatay diha mismo sa lugar ang driver sa motorsiklo ug usa sa iyang backrider. Samtang ang usa pa ka backrider nga usa ka 25-anyos nga babaye nga residente sa Barangay Tiguma, Pagadian City, gidala sa ospital alang sa pagtambal.
Wala ra usab nasamdan ang driver sa Xpander ug gidala na sa Labangan MPS aron papanubagon iyang salaod. Padayon ang imbestigasyon sa kapulisan aron mailhan ang duha ka namatay ug ma-contact ang ilang mga paryente.
Photo Courtesy: PIO, ZSPPO
