Gipasidungog sa Provincial Government of Negros Occidental ang kaisog ug sakripisyo sa mga beterano sa Ikaduhang Gubat sa Kalibutan atol sa pagtimaan sa ika-81 nga Negros Island Victory Day niadtong Septiyembre 9 sa Provincial Capitol Park and Lagoon sa Bacolod City.
Gipangunahan ni Governor Bong Lacson ang selebrasyon nga adunay wreath-laying ceremony sa Monument of WWII Veterans ug 21-gun salute nga gipahigayon sa Philippine Army. Ang commemorative program gihimo sa Capitol Social Hall.
Ang Septiyembre 9, 1945 maoy timaan sa pagsurender sa kapin 13,500 ka tropang Hapon ubos ni Lt. Gen. Takeshi Kono sa Sta. Rosa, Murcia, Negros Occidental, nga nagtimaan sa kagawasan sa Negros Island gikan sa Japanese occupation.
Nahisgutan usab ang mga panagsangka tali sa Japanese forces, Filipino guerrillas ug Allied forces, lakip ang Battle of Patag sa Silay City, nga giila nga posibleng usa sa kataposang mga gubat sa Ikaduhang Gubat sa Kalibutan sa Pacific.
Sa iyang mensahe, gipasiugda ni Governor Lacson nga kinahanglan ipadayon sa kasamtangang henerasyon ang gugma sa nasod, kaisog ug sakripisyo nga gipakita sa mga beterano.
Gipahinumdoman usab niya ang mga Negrense nga dili angay pasagdan o isipon nga ordinaryo ang kagawasan, tungod kay kini nakab-ot pinaagi sa dakong sakripisyo sa mga ninglabay nga henerasyon.
Gitambongan ang kalihokan sa mga miyembro sa Veterans Federation of the Philippines–Negros Occidental Chapter, Philippine Veterans Affairs Office, mga ahensya sa gobyerno, non-government organizations ug mga empleyado sa Kapitolyo.
Photo Courtesy: Negros Occidental Provincial Government
