Imbis nga mag session, balhog sa prisohan ang usa ka High Value Individual nga SK Chairman nga giila sa alyas “Franz” 23-anyos ug residente sa Brgy. Mahayag, Isabel, Leyte human kini nadakpan sa hiniusang buy-bust operation sa kapulisan sa Isabel Municipal Police Station ug Philippine Drug Enforcement Agency (PDEA) didto sa naasoy nga lugar niadtong nakalabay nga adlaw.
Narekober atol sa operasyon ang lima ka sachet nga adunay gidudahang shabu, lakip ang usa ka sachet nga maoy subject sa buy-bust transaction. Narekober usab ang buy-bust money ug uban pang ebidensiya. Ang tanang nakumpiskang mga butang gimarkahan ug gi-imbentaryo sa lugar sa operasyon atubangan sa gikinahanglang mga saksi, lakip ang mga opisyal sa barangay ug representante sa media.
Ang nakumpiskang ebidensiya gidala na ngadto sa Forensic Unit sa Palo, Leyte alang sa qualitative ug quantitative examination. Samtang ang suspek anaa sa kustodiya sa Isabel MPS og mag-atubang sa kasong paglapas sa Section 5 (Sale of Dangerous Drugs) ug Section 11 (Possession of Dangerous Drugs) ubos sa Article II sa Republic Act No. 9165, o Comprehensive Dangerous Drugs Act of 2002.
Photo Courtesy: Isabel MPS
