Gitabangan nga makapadayon sa pag-eskwela ang mga batang biktima sa Online Sexual Abuse and Exploitation of Children o OSAEC sa dakbayan sa Iligan pinaagi sa pagpaningkamot sa Children Assessment and Processing Center CSWD.
Sumala kang Jeniffer P. Sanggoyod, Social Welfare Officer IV ug focal person sa OSAEC sa CSWD nga padayon ang mga programa sa siyudad alang sa prevention, advocacy, reporting mechanism ug ilabina sa aftercare sa mga batang na-rescue.
Matud niya, importante nga mahatagan og suporta ang mga bata bisan human na ang rescue operation, ilabina kung ang ginikanan o tig-atiman mismo ang nakit-ang nalambigit sa kaso ug mahimong ma-detain.
Kabahin niini ang Project SAFE, nga gitutokan sa CSWD aron matabangan ang mga batang biktima nga makapadayon sa ilang pag-eskwela ug dili maputol ang ilang edukasyon tungod sa ilang nasinati.
Gipalig-on usab sa CSWD ang monitoring ug aftercare aron masiguro nga padayon ang pag-atiman sa mga batang survivors ug malikayan nga mabalik sila sa kahimtang nga mahimong makadaot kanila.
Kahinomdoman, nga sukad niadtong 2022, miabot na sa 107 ka mga bata ang na-rescue, samtang adunay 32 ka rescue operations ug 20 ka convictions nga nalambigit sa mga kaso, sumala sa datos nga gipaambit sa opisyal.
Tungod niini, giila nga success stories ang mga batang na-rescue samtang high school pa, apan nakapadayon sa pag-eskwela hangtod sa kolehiyo. Sa pagkakaron, tulo na ka victim-survivors ang nakahuman og kolehiyo, nga giila isip resulta sa padayong aftercare ug suporta nga gihatag ngadto kanila.
