Gipailawom og usa ka drug awareness symposium sa Tubod Municipal Police Station ang 500 ka mga estudyante sa Teofila C. Quibranza Memorial School sa Barangay Pualas, Tubod, Lanao del Norte, ning bagohay pa lamang.
Gipunting sa kapulisan ang nagkalain-laing isyu nga may kalabotan sa kaluwasan ug proteksyon sa mga kabatan-onan, sama sa active shooting preparedness, anti-illegal drugs ubos sa Republic Act 9165, Bawal Bastos Law o RA 11313, ug Anti-Bullying Act o RA 10627.
Tumong sa kalihokan nga mapalapdan ang kahibalo sa mga estudyante bahin sa ilang kaluwasan, katungod ug responsibilidad, ingon man ang paglikay sa ilegal nga droga, bullying ug uban pang matang sa pagpang-abuso sa sulod ug gawas sa eskwelahan.
