Gihingusgan sa Highway Patrol Group o HPG Zamboanga Sibugay ang ilang kampanya alang sa kaluwasan ug disiplina sa mga motorista sa probinsya, ubos sa pagpanguna ni HPG Provincial Officer Wilfrido Ator.
Pokus sa maong kampanya ang hugot nga pagpatuman sa mga balaod sa trapiko, lakip ang pagsusi sa mga dokumento sa sakyanan, lisensya sa drayber, pagsul-ob og helmet sa mga motorcycle rider, ug uban pang paglapas nga mahimong hinungdan sa aksidente sa dalan.
Gipahinumdoman usab sa HPG Sibugay ang mga motorista nga sundon ang speed limits, likayan ang delikadong pag-overtake ug pagdrayb nga walay igong pag-amping, ilabina sa mga lugar nga daghan og pedestrian ug sakyanan.
Matud sa HPG, dili lamang pagdakop o pag-isyu og violation tickets ang tumong sa ilang operasyon, kundili ang pagpalambo sa disiplina ug responsableng pagdrayb aron malikayan ang mga aksidente.
Nanawagan si Ator sa tanang motorista nga makigtambayayong sa kapulisan ug magmatngon kanunay sa ilang pagbiyahe, alang sa mas luwas ug hapsay nga mga dalan sa Zamboanga Sibugay.
