Napahigayon ang libreng Mobile Chest X-Ray Caravan ug Active Case-Finding Program sa Barangay Kingking Covered Court, Pantukan, Davao de Oro Setyembre 8-9, 2026.
Tumong sa kalihokan nga mapaduol sa mga residente ang chest X-ray examination ug matabangan ang sayong pag-ila sa posibleng mga kaso sa pulmonary conditions, ilabina ang tuberculosis o TB.
Target sa programa nga ma-screen ang 200 ka kliyente, diin prayoridad ang mga household contact sa mga pasyente nga adunay TB ug mga indibidwal nga nakasinati og ubo sulod na sa kapin duha ka semana. Apil usab sa screening ang ubang mga residente nga gustong magpa-check.
Gipahigayon kini pinaagi sa pakigtambayayong sa Provincial Health Office-Davao de Oro, Barangay Kingking, Barangay Kingking Health Center ug Pantukan Primary Health Care Facility, alang sa sayong detection ug hustong pagdumala sa posibleng mga kaso sa TB.
