Nakamugna ang mga tigdukiduki og bag-ong klase sa “smart underwear” nga gidisenyo aron awtomatikong mosukod sa kasubsob sa pagpagawas og hangin (utot) sa nagsul-ob niini, uban ang tumong nga makatabang sa pagtuon bahin sa mga bakterya sa tinai ug sa kahimsog sa sistema sa paghilis.
Si Brantley Hall, usa ka associate professor sa University of Maryland, ang nangulo sa pagpalambo niini nga teknolohiya. Tumong sa proyekto nga analisahon kung giunsa pag-apektar sa pagkaon—ilabi na ang pagkonsumo og fiber—ang paghimo og gas sulod sa tinai.
Adunay gamay ug lingin nga himan nga gitaod sa likod nga bahin sa underwear. Gisangkapan kini og mga electrochemical sensor nga makamatikod sa hydrogen, usa sa mga gas nga maprodyus kung ang mga bakterya sa tinai magproseso sa pagkaon ug dayon ipagawas pinaagi sa pag-utot.
Ang smart underwear unang gigamit sa “Human Flatus Atlas,” usa ka proyekto sa panukiduki diin ang mga boluntaryo nagtala sa ilang gikaon samtang gibantayan ang lebel sa gas sa ilang tinai.
Sa pasiunang pagtuon, ang mga partisipante nagsul-ob sa smart underwear sulod sa mga 12 ka oras matag adlaw sa gidugayon nga usa ka semana. Gipakita sa mga resulta nga adunay aberids nga 32 ka higayon nga pag-utot sulod nianang 12 ka oras nga panahon. Gisukod usab sa himan ang pag-utot samtang natulog—usa ka aspeto nga wala pa kaayo gitun-i kaniadto.
Bisan tuod ang smart underwear wala pa giklasipikar isip usa ka medikal nga himan, mahimo kining makatabang sa pagsusi sa mga pasyente nga nag-antos sa pagburot sa tiyan, sakit sa tiyan, ug sobra nga gas. Nagtanyag kini og pamaagi sa pagmonitor nga padayon ug dili makahasol o makasamad sa lawas (non-invasive), kon itandi sa mga karaan nga pamaagi nga nagkinahanglan og pagsulod og tubo ngadto sa tumbong.
Hinuon, namatikdan sa mga eksperto nga ang kanunay nga pag-utot wala magpasabot dayon nga adunay naglungtad nga medikal nga kondisyon. Angay bantayan sa tawo ang mga kauban nga sintomas sama sa grabe nga pagburot sa tiyan, kausaban sa batasan sa pag-tae, pagkunhod sa timbang, o presensya sa dugo sa hugaw. Gikinahanglan ang dugang nga pagtuon sa dili pa magamit ang teknolohiya aron mailhan ang usa ka espesipikong sakit.
Photo Courtesy: University of Maryland
