Gibuhatan og interbensyon sa City Agriculturist’s Office sa Iligan ang mga mag-uuma ug mananagat nga gihatagan og dako nga hagit sa hilabihang kainit ug hulaw o El Niño sa siyudad.
Tungod niini, gipahigayon ang pagbaligya og barato nga bugas sa presyo nga ₱20 matag kilo alang sa mga vulnerable groups sama sa PWDs, single parents, ug farm workers, diin matag barangay adunay gipagahin nga 100 ka sako.
Gawas niini, gipahugtan usab ang Special Intervention for Agricultural Operation (SIAO) Program o “One Barangay, One Product” nga nakadawat og ₱2.6 milyon nga pundo gikan sa DSWD alang sa 44 ka barangay.
Nag-apod-apod usab ang opisina og mga liso alang sa cash crops ug National Urban and Peri-Urban Agriculture Program (NUPAP), kauban ang Philippine Coconut Authority sa paghatag og 4,700 ka planting materials, ug ang Philippine Crop Insurance Corporation (PCIC) aron mahatagan og cash indemnification ang mga mag-uuma ug mananagat nga naapektuhan ang abot tungod sa kainit.
