Naglunsad og intensive investigation ug hot pursuit operation ang Kapalong Municipal Police Station human gipusil ang usa ka lalaki sa Barangay Luna, Kapalong, Davao del Norte pasado alas 10:30 sa gabii niadtong nakalabay nga adlaw.
Giila ang biktima nga si alyas “Yan-Yan,” nga nagsakay sa itom nga Suzuki Gixxer uban sa iyang igsoon dihang gisundan ug gipusil sa wala pa mailhing mga suspek nga nagsakay usab og motorsiklo sa dapit sa Crossing Luna, duol sa plantasyon sa saging. Tungod sa pagpamusil, nawad-an siya og kontrol sa motorsiklo ug nahagsa sa dalan.
Nakaangkon ang biktima og tulo ka samad pinusilan ug unang gidala sa Kapalong District Hospital sa wala pa gibalhin sa Davao Regional Medical Center alang sa dugang nga pagtambal.
Samtang, nakaangkon usab og gagmayng samad ug gas-gas ang iyang igsoon tungod sa pagkahagsa sa motorsiklo. Narekober sa kapulisan sa crime scene ang tulo ka fired cartridges nga gituohang gikan sa .45 caliber nga armas, nga ipailawom sa ballistic examination aron masusi kung adunay kalambigitan sa ubang kaso.
Human sa insidente, gipakusgan sa Kapalong MPS ang foot, bicycle ug mobile patrols aron mapalig-on ang seguridad sa publiko.
Photo Courtesy: PNP Kapalong Municipal Police Station
