Naghatag sang suporta ang Armed Forces and Police Savings and Loans Association Incorporated ukon AFPSLAI sa mga pulis nga iga-deploy bilang election contingent’s para sa 2026 BARMM Parliamentary Elections.
Nagbisita ang AFPSLAI Gensan Branch kay Police Regional Office 12 Director PBGEN Alan B. Manibog sa Camp General Paulino T. Santos sa General Santos City sang Setyembre 7, 2026.
Nagdonar ang AFPSLAI sang hygiene kits nga ipanagtag sa mga personnel sang PRO 12 nga magsilbi bilang election contingents.
Ginpahayag sang AFPSLAI nga ini nga inisyatibo isa ka porma sang padayon nga suporta sa Philippine National Police ukon PNP kag sa mga personnel nga may importante nga papel sa pagpatuman sang malinong, hapsay kag sigurado nga eleksyon.
Nagpasalamat naman si PBGEN Manibog sa AFPSLAI kag ginpahayag nga daku nga bulig ang nasambit nga suporta sa mga pulis nga magtuman sang ila katungdanan para sa luwas kag malinong nga pagdumala sang eleksyon.
Photo Courtesy: PNP Police Regional Office 12
