Arestado ang isa ka 49-anyos nga ginapatihan nga drug personality sa buy-bust operation sang Palimbang Municipal Police Station kag Philippine Drug Enforcement Agency ukon PDEA Regional Office 12 sa Barangay Badiangon, Palimbang, Sultan Kudarat, gab-i sang September 6, 2026.
Ginkilala ang suspek sa alyas nga “Malon,” isa ka livestock agent kag residente sang nasambit nga lugar. Narekober sa operasyon ang duha ka sachet sang ginapatihan nga shabu nga may kabug-aton nga ginabulubanta sang 3.295 gramos, kag nagabalor sang masobra P10,544.
Narekober man ang marked money nga P500 nga gingamit sa buy-bust operation. Ginpahibalo sa suspek ang iya constitutional rights kag gindala sa Palimbang Municipal Police Station para sa dokumentasyon kag nagakaigo nga disposisyon sang mga ebidensya.
Suno sa PRO 12, padayon ang maid-id nga kampanya batok ilegal nga droga para sa mas hilway kag malinong nga komunidad.
Photo Courtesy: PNP Police Regional Office 12
