Nadugangan ang mga kagamitan sa Pamahalaang Lungsod sa General Santos alang sa pagpalig-on sa pagpanalipod sa kadagatan ug kinaiyahan.
Gidawat ni City Mayor Lorelie G. Pacquiao ang mga kagamitan gikan sa Department of Environment and Natural Resources o DENR 12 ug Sarangani Bay Protected Seascape Protected Area Management Board o SBPS-PAMB atol sa turnover ceremony sa City Hall Grounds.
Lakip sa mga kagamitan ang usa ka utility van alang sa wildlife rescue, duha ka motorsiklo, 11 ka three-wheeled cargo motorcycles, POC radios nga adunay SIM cards, camera, SCUBA equipment ug mga speaker.
Gamiton kini sa pagpalig-on sa Bantay Dagat operations, wildlife rescue, coastal monitoring ug uban pang kalihokan alang sa pagpanalipod sa marine resources sa Sarangani Bay.
Nagpasalamat si Mayor Pacquiao sa DENR 12 ug SBPS-PAMB sa padayong suporta sa mga programa sa kinaiyahan sa lungsod. Gisaad usab sa DENR 12 ang padayong pagtabang sa General Santos City, lakip ang capacity-building alang sa People’s Organizations, Bantay Dagat teams ug coastal communities. Gitapos ang turnover sa pagpirma sa Deed of Donation and Acceptance.
