Nadakpan sa mga kapulisan ang usa ka indibidwal nga giila isip Provincial Top 10 Most Wanted Persons atol sa implementasyon sa usa ka warrant of arrest sa Bayugan City, Agusan del Sur, alas-9:15 sa buntag kagahapong adlawa, Setyembre 2, 2026. Ang operasyon gipangulohan sa mga personnel sa Bayugan Component City Police Station (CCPS) ubos sa liderato ni PLTCOL Josef Carlo V. Silang, Chief of Police.
Ang nadakpan giila sa alyas nga “Jer,” 60 anyos, biyudo, ug residente sa Bayugan City, Agusan del Sur. Gipatuman sa kapulisan ang warrant of arrest batok kang “Jer” alang sa kasong Acts of Lasciviousness in Relation to Republic Act No. 7610, o ang Special Protection of Children Against Abuse, Exploitation and Discrimination Act.
Ang maong kaso nadokumento ubos sa Criminal Case No. 9144 ug ang warrant gi-isyu sa Regional Trial Court, Branch 7, Bayugan City, nga adunay girekomendar nga piyansa nga ₱108,000.
Human sa malampusong pagdakop, gidala ang suspek ngadto sa Bayugan City Police Station Custodial Facility, diin siya temporaryong gipabilin alang sa hustong disposisyon ug pag-atubang sa angay nga proseso sa korte.
Photo courtesy: PNP Bayugan City
