Gihatagan og pag-tagad sa Leyte Police Provincial Office (LPPO) ang usa ka video nga mikatag sa social media nga nagpakita sa pipila ka mga tawo nga nagsul-ob og sibilyan nga sinina ug giingong nagdala og mga armas atol sa operasyon sa usa ka border control point sa Albuera, Leyte, diin makita usab sa maong video ang presensya sa mga pulis nga naka-assign sa maong lugar.
Human madawat ang impormasyon, gilayon nga gimando sa LPPO ang tukmang aksyon aron masuta ang tinuod nga kahimtang ug mga sirkumstansiya nga nalambigit sa maong insidente. Kabahin sa unang lakang sa kapolisan ang pagrelieved sa mga police personnel nga naka-assign sa maong border control point.
Girekomenda usab sa LPPO ang administrative relief sa Chief of Police sa estasyon sa kapolisan nga may hurisdiksiyon sa maong lugar, samtang nagpadayon ang imbestigasyon. Tumong niini nga maseguro ang hapsay ug patas nga pag-susi sa insidente ug aron matino ang posibleng responsibilidad sa mga nalambigit.
Sumala pa sa LPPO, ilang sutaon pinaagi sa komprehensibong imbestigasyon ang identidad, awtoridad ug mga sirkumstansiya sa presensya sa mga tawo nga nakita sa video nga nagdala og armas. Kung mapamatud-ang adunay paglapas sa balaod, lagda o regulasyon, ang mga responsable pagaatubangon subay sa hustong proseso ug kasamtangang mga balaod.
Gipasalig usab sa LPPO ang publiko nga ang maong kaso pagadumalahon nga walay pagpihig ug subay sa due process. Gipasiugda usab niini ang ilang padayong pagpaningkamot sa pagmintinar sa propesyonalismo, accountability ug kaluwasan sa publiko sa tanang operasyon sa kapolisan.
Photo Courtesy: Magtataho Chronicles
