Nanawagan ang Philippine Drug Enforcement Agency (PDEA) 9 sa publiko nga aktibong mosuporta ug makigtambayayong sa mga inisyatiba batok sa illegal nga droga aron mapugngan ang pag-apod-apod ug pagdaghan niini sa mga komunidad.
Matud ni PDEA-9 Regional Director Ryan Babang, dili lamang responsibilidad sa mga otoridad ang pagsumpo sa illegal nga droga, kundili gikinahanglan usab partisipasyon sa matag sektor aron mapakusgan ang inisyatiba sa pagpuo sa mga illegal drugs sa rehiyon.
Gipasiugda ni RD Babang ang kamahinungdanon sa pagpalig-on sa koordinasyon tali sa gobyerno, komunidad ug nagkadaiyang organisasyon aron mas epektibong makab-ot ang kampanya batok sa illegal nga droga.
Lakip usab sa iyang gihangyo ang grupo sa media nga aktibong motabang sa pagpakatap sa tukmang impormasyon nga gikinahanglan sa publiko aron mapakunhod ang ihap nga posibleng malulong sa paggamit sa illegal drugs.
Segun ni Babang, pinaagi sa hustong impormasyon ug panaghiusa, mas mapalig-on ang paningkamot sa pagpugong sa illegal nga druga sa nagkadaiyang bahin sa Zamboanga Peninsula Region.
