Sikop sa kapulisan ang 19-anyos nga lalaki, pinaagi sa Buenavista Municipal Police Station, tungod sa pag pangawat og manok sa Barangay Malpoc, Buenavista, Agusan del Norte. Ang nadakpan giila lamang sa alyas nga “Mart,” 19-anyos, ulitawo ug residente sa naasoy nga lugar.
Sumala sa imbestigasyon, nadakpan ang suspetsado kalabot sa giingong pagpangawat sa manok. Apan atol sa pag rekisa sa iyang posesyon, nakaplagan usab sa kapulisan ang 0.4 grams nga gituohang shabu, nga gibanabanang nagkantidad og 3,400 pesos.
Gikumpiska sa mga otoridad ang maong gituohang ilegal nga droga isip ebidensya ug magpadayon ang imbestigasyon alang sa tukmang pagpasaka sa kaso.
Sa pagkakaron, ang suspek anaa sa Buenavista MPS, alang sa tukmang pagpasaka ug kaso.
