Gipakusgan ang mga lakang alang sa kaluwasan ug seguridad sa mga estudyante sa San Jose National High School pinaagi sa pagpatuman sa dugang nga mga security measures sulod sa campus.
Nahuman na ang pagtukod sa wall fencing sa likod nga bahin sa eskwelahan aron mapalambo ang proteksyon ug pagkontrol sa access sa school premises. Operational na usab ang dugang nga mga CCTV camera nga gihatag sa eskwelahan aron mas mapalapad ang monitoring ug surveillance sulod sa campus.
Gipalapdan ug gipaklaro usab ang public address system sa eskwelahan pinaagi sa dugang nga mga equipment. Lakip usab sa mga kalamboan ang bag-ong pagpintal sa mga classroom ug uban pang bahin sa eskwelahan, nga gitumong sa paghimo og mas hapsay ug komportable nga learning environment alang sa mga estudyante.
Samtang, naka-line up na ang pag-ayo sa guard house aron dugangan pa ang seguridad sulod sa campus ug mas mapalambo ang pagdumala sa pagsulod ug paggawas sa mga tawo sa eskwelahan.
Gipahayag usab nga dili pa kutob dinhi ang mga lakang alang sa kaluwasan sa mga estudyante. Nakahimo na og inspection sa nagkalain-laing mga eskwelahan aron mailhan ang mga pasilidad ug bahin nga nanginahanglan og pag-ayo ug pagpauswag.
Padayon nga palig-onon ang mga programa ug proyekto alang sa safety ug security aron masiguro nga ang mga eskwelahan luwas, hapsay, ug angay alang sa pagkat-on sa mga kabataan.
Photo Courtesy: Mayor Alfred Romualdez
