Nagpadayon ang mga diskusyon sa pagpangita og praktikal nga solusyon sa traffic congestion sa Dakbayan sa Sugbo human nakigpulong si Cebu Gov. Pamela Baricuatro sa mga opisyal sa Armed Forces of the Philippines (AFP) bahin sa posibleng paggamit sa usa ka bahin sa Central Command area sa Barangay Apas, Lahug.
Usa sa mga posibilidad nga gihisgutan mao ang pag-abli sa bahin sa Wilson Street sulod sa maong lugar aron mahimong alternatibong agianan sa mga motorista. Gilauman nga makatabang kini sa pagpakunhod sa traffic congestion sa palibot sa maong lugar kung maaprubahan ug mapatuman.
Gihingusgan ni Baricuatro ang maong proposal isip kabahin sa mga paningkamot sa pagpangita og mga pamaagi nga mahimong epektibong makatubag sa problema sa trapiko. Tumong sa inisyatiba nga makadugang og access route ug makahatag og dugang nga kapilian sa mga motorista nga moagi sa maong area.
Bisan pa niini, wala pa mapinal ang bisan unsang kasabutan tungod kay padayon pa ang mga diskusyon tali sa mga hingtungdan. Kinahanglan pang masusi pag-ayo ang nagkalain-laing security concerns aron masiguro nga dili makompromiso ang seguridad sa Central Command area.
Photo courtesy: Cebu Province
