Nagpabiling taas ang kaso sa adolescent birth rate sa mga kababayen-an nga nag-edad 15 hangtod 19 anyos sa SOCCSKSARGEN Region, sumala sa datos sa Department of Health–Center for Health Development (DOH-CHD XII).
Gipadayag ni Joana Kristine A. Chio, Nurse V ug Adolescent Health and Development Program (AHDP) Coordinator sa DOH-CHD XII, nga miabot sa 9,292 ang ihap sa mga nanganak nga kababayen-an nga sakop sa 15-19 anyos nga age group niadtong 2025. Mas taas kini kumpara sa 8,898 ka kaso nga natala niadtong 2024, o katumbas sa pagtaas nga 394 ka kaso sulod sa usa ka tuig.
Samtang, nakarekord og gamay nga pagkunhod sa adolescent births sa mas batan-ong grupo nga 10 hangtod 14 anyos, diin mikunhod ang ihap gikan sa 281 ka kaso niadtong 2024 ngadto sa 262 ka kaso niadtong 2025.
Bisan pa sa pagkunhod sa kaso sa 10-14 anyos nga grupo, nagpabiling dakong hagit alang sa mga health authorities ang taas nga ihap sa adolescent pregnancy, ilabina sa mga batan-ong nag-edad 15 hangtod 19 anyos.
Gipasiugda sa DOH-12 ang padayong pagpatuman sa mga programa ug serbisyo alang sa adolescent health, lakip ang hustong impormasyon, edukasyon ug access sa health services aron matubag ang isyu sa sayong pagmabdos sa mga kabataan sa rehiyon.
Photo Courtesy: Philippine News Agency
