Patay ang drayber ug ang sakay sa usa ka motorsiklo human kini mabangga sa laing motorsiklo didto sa national highway sa Barangay Alejos, Bato, Leyte, pasado alas 6:30 ang takna sa gabie, niadtong nakalabay nga adlaw.
Ang usa sa mga motorsiklo gimaneho ni alyas “Ricky,” 25 anyos, residente sa Poblacion City, Naga, Cebu, nga angkas si alyas “Sheila,” 20 anyos, residente sa Calbayog City, Samar. Ang laing motorsiklo gimaneho ni alyas “Ben,” 13 anyos, residente sa Bato, Leyte.
Base sa inisyal nga imbestigasyon sa mga otoridad, nagbiyahe sa samang direksiyon ang duha ka motorsiklo. Pag-abot sa lugar sa aksidente, hinay-hinay nga miliko sa wala ang motorsiklo nga gimaneho ni “Ben” aron mosulod sa usa ka karsadang padulong sa ilang balay. Giingong paspas ang dagan sa motorsiklo ni “Ricky” niadtong higayona, hinungdan nga aksidenteng nagbangga ang duha ka sakyanan.
Tungod sa aksidente, nangangkon og mga samad ang mga nalambigit ug gilayon nga gidala sa Hilongos District Hospital sa Hilongos, Leyte, alang sa pagtambal. Apan, wala maluwas si “Ricky” ug ang iyang sakay nga si “Sheila.”
Samtang, ang duha ka motorsiklo gidala ug gipailalom sa kustodiya sa Bato Municipal Police Station alang sa hustong disposisyon.
