Naglunsad ug inventory ang Department of Education (DEPED) Region 9 aron masuta kon nakakompleto na ba ang pagpalit ug mga metal detector sa mga pampublikong eskwelahan sa rehiyon.
Matud ni DEPED 9 Regional Director Ronelo Al K. Firmo, nakalusad na ang DEPED Central Office ug ikatulong audit o inventory aron maklaro nga nadugangan ba ang mga eskwelahan nga nagbaton ug mga metal detector.
Pinaagi niini, tumong sa DepEd 9 nga mahibal-an ang kahimtang sa mga eskwelahan kalabot sa presensya sa maong mga kagamitan nga gitumong sa pagpalig-on sa seguridad sulod sa mga tulunghaan.
Kabahin kini sa mga lakang nga gipatuman aron masiguro ang kaluwasan sa mga estudyante, magtutudlo ug uban pang kawani sa eskwelahan.
Gilauman nga pinaagi sa maong inventory, mas mapalambo pa ang pagplano ug pagpatuman sa mga programa alang sa seguridad sa mga pampublikong eskwelahan sa rehiyon.
