Patay ang usa ka 56-anyos nga motorista human mibangga ang iyang motorsiklo sa usa ka ELF truck nga nakaparking sa daplin sa National Highway sa Purok 1, Barangay Kaangayan, Mahayag, Zamboanga del Sur, niadtong nakalabay nga adlaw.
Base sa inisyal nga imbestigasyon sa Mahayag Municipal Police Station, ang biktima residente sa Marikina City ug nagmaneho sa itom nga KYMCO AK 550 maxi-scooter ug nagbiyahe gikan sa Zamboanga City padulong sa Pagadian City kauban ang grupo sa mga big-bike rider gikan sa Metro Manila, pinaagi sa Sindangan-Dumingag Road.
Apan, naigo sa motorsiklo ang likod nga wala nga bahin sa ELF truck nga gikatahong nakaparking sa daplin sa highway. Gidala sa iyang mga kaubang rider ang biktima ngadto sa ospital tungod sa daghang samad nga naangkon, apan gideklara siyang dead on arrival sa miatiman nga doktor.
Samtang, ang 34-anyos nga driver sa truck, residente sa Dumalinao, Zamboanga del Sur, gidala sa Mahayag Municipal Police Station alang sa dugang nga imbestigasyon.
