Nadakpan ang duha ka lalaki pinaagi sa joint buy-bust operation sa mga otoridad sa Purok 3, Barangay New Visayas, Panabo City, Davao del Norte niadtong nakalabay nga adlaw.Gipahigayon ang operasyon sa Panabo City Police Station ug 2nd Davao Norte Mobile Force Company, uban ang Philippine Drug Enforcement Agency (PDEA) Davao del Norte.
Nasikop sa operasyon ang 29-anyos nga lalaki nga giilang si alyas Paul, usa ka mag-uuma ug residente sa Barangay New Visayas, Panabo City, ug 21-anyos nga lalaki nga giilang si alyas Mark, usa ka construction worker ug residente sa Poblacion, Compostela, Davao de Oro.
Nasakmit gikan sa mga dinakpan ang tulo ka heat-sealed transparent sachet nga adunay puti nga kristal nga substansiya nga gituohang shabu, usa niini giingong subject for sale ug ang duha para sa possession.
Nasakmit usab ang usa ka genuine nga ₱1,000 bill nga gigamit isip marked money, ingon man usa ka Camel ug usa ka Marlboro nga kaha sa sigarilyo. Dugang niini, ang nakumpiskang gidudahang shabu adunay gibana-banang gibug-aton nga 10.14 gramos ug standard drug price nga ₱69,013.20.
Sa pagkakaron, ang duha ka suspek, uban sa mga nakumpiskang droga ug uban pang ebidensiya, anaa karon sa kustodiya sa Panabo City Police Station alang sa dokumentasyon ug pagpasaka sa tukmang kasong kriminal batok kanila sa korte.
Photo Courtesy: News Wire
