Patay on the spot, ang 37-anyos nga babaye human madat-ogan sa usa ka nadisgrasyang bongo truck sa bukirang bahin sa Purok 7, Barangay Legaspi, Cagdianao, Dinagat Islands, kagahapon sa buntag.
Base sa inisyal nga imbestigasyon, nagkarga og mga komersyal nga paninda ang maong truck ug duha lamang ang sakay niini ang biktima ug ang iyang bana nga mao usab ang nagmaneho. Wala pa gipadayag sa mga otoridad ang ilang mga ngalan.
Sumala ni Police Chief Master Sergeant Richly Gayo, imbestigador sa kaso, napalungan sa makina sa truck samtang nagsaka kini sa usa ka bakilid nga bahin sa dalan. Misunod niini ang kapakyasan sa brake, hinungdan nga mikalit og atras ang sakyanan, dihang nawad-an og kontrol, ug nahulog sa daplin sa pangpang.
Matud pa sa opisyal, sa wala pa mahulog ang truck, milukso ang babaye aron makalikay. Apan, sa wala damha, natumbahan siya sa nag-atras nga sakyanan, nga maoy hinungdan sa iyang hinanaling kamatayon. Dugang pa ni PCMS Gayo, mas makapasubo ang insidente tungod kay adlaw usab sa iyang natawhan ang panghitabong trahedya, Samtang gikatahong naluwas ra ang bana sa biktima.
Photo Courtesy:Michelle Bomungcag
