Patay ang usa ka backrider samtang nakigbisog alang sa iyang kinabuhi ang driver sa motorsiklo human mabanggaan sa usa ka puti nga SUV sa national highway sa may boundary sa Dauin ug Zamboanguita, Negros Oriental, pasado alas-12 sa tungang gabii niadtong nakalabay nga adlaw.
Ang backrider nga giila sa alyas “Lito” gideklarang dead on arrival sa ospital, samtang ang rider nga giila sa alyas “J.B.” nagpabiling kritikal ug padayon nga gitambalan. Ang duha ka biktima mga residente sa Barangay Mantiquil, Siaton.
Sumala sa inisyal nga imbestigasyon, nagdagan ang SUV ug ang motorsiklo sa parehong direksyon gikan sa Dumaguete paingon sa Zamboanguita sa dihang nabanggaan sa SUV ang motorsiklo, hinungdan nga nalabay ang duha ka sakay.
Matod sa Zamboanguita Rescue Team, usa sa gisubay nga anggulo sa imbestigasyon mao ang gituohang kusog nga dagan sa SUV sa wala pa mahitabo ang aksidente.
Ang insidente unang namatikdan sa grupo sa Mayor ug Bise Mayor sa Dauin, nga maoy dayong mipahibalo sa mga rescuer ug kapulisan aron matabangan ang mga biktima ug maseguro ang lugar sa aksidente.
Sa pagkakaron, anaa na sa kustodiya sa Dauin Municipal Police Station ang drayber sa SUV, usa ka langyaw nga giila lamang sa alyas “R.A.”. Nagpadayon ang imbestigasyon sa kapulisan aron matino ang eksaktong hinungdan sa maong panagbangga ug ang posibleng mga kasong ipasaka batok sa drayber.
Photo Courtesy:shutterstock
