Nagpadayon ang Department of Health (DOH) Caraga sa pagpakusog sa kampanya batok sa dengue pinaagi sa pag-apod-apod og mga gamit alang sa vector control sama sa insecticides ug spray cans ngadto sa nagkadaiyang probinsya ug dakbayan sa rehiyon.
Matud sa DOH-Caraga, nagtinabangay usab sila sa mga lokal nga panggamhanan aron magpahigayon og mga orientation kabahin sa Department Memorandum No. 2005-0420 o ang gitawag nga “Four O’Clock Habit Dengue 1-3-7 Strategy,” nga nagtumong sa mas epektibong pagpugong sa pagdagsa sa dengue pinaagi sa regular nga pagpanglimpyo ug paglaglag sa mga posibleng pamuy-an sa lamok.
Base sa talaan sa DOH-Caraga hangtod Hulyo 25, adunay 1,813 ka kaso sa dengue nga narekord sa tibuok rehiyon. Mas ubos kini kumpara sa 5,813 ka kaso nga natala sa susamang panahon niadtong miaging tuig.
Sa lebel sa mga probinsya, adunay 79 ka kaso sa Agusan del Norte, 492 sa Agusan del Sur, 74 sa Dinagat Islands, 242 sa Surigao del Norte, ug 363 sa Surigao del Sur.
Samtang sa mga dakbayan, narekord ang 88 ka kaso sa Bayugan City, 41 sa Bislig City, 169 sa Butuan City, 60 sa Cabadbaran City, 97 sa Surigao City, ug 108 sa Tandag City.
Gipasiugda sa DOH-Caraga nga padayon nilang gipatuman ang Intensified Vector Control Strategy for Dengue ug ang ubang giya alang sa pagpugong sa pagkatap sa sakit.
Dugang pa sa ahensya, nagpadayon usab ang ilang information campaign batok sa dengue sa lebel sa mga barangay pinaagi sa National Health Workforce Support System, aron mapalig-on ang kahibalo sa komunidad sa hustong paagi sa paglikay ug pagpugong sa dengue.
Photo courtesy: DOH Caraga
