Mipahayag og negatibong impresyon ang pipila ka mga residente sa Tagum City may kalabotan sa State of the Nation Address (SONA) 2026 ni Presidente Ferdinand Marcos Jr. nga gipahigayon kagahapong adlawa Hulyo 27, 2026. Matud nila, adunay mga saad ug programa nga ilang gilaoman apan wala pa nila mabati ang konkretong kausaban sa ilang adlaw-adlaw nga panginabuhi.
Sumala sa pipila ka mga residente nga nahinabi sa Juander Radyo Tagum news team, nagpadayon gihapon ang ilang kabalaka sa pagsaka sa presyo sa mga batakang palaliton, kakulang sa maayong panginabuhian, ug uban pang isyu nga ilang gilauman nga matubag pinaagi sa mga programa sa gobyerno.
Bisan pa niini, aduna usab ubang residente nga nag-ingon nga ilang hulaton ang aktuwal nga pagpatuman sa mga gipahibalo sa administrasyon sa dili pa sila mohatag og hingpit nga paghusga sa nahisgutang SONA.
Sa kinatibuk-an, nagkalainlain ang reaksyon sa mga residente sa Tagum City, diin ang uban nagpabiling kritikal samtang ang uban naglaom nga makita sa umaabot ang tinuod nga epekto sa mga programa ug mga saad sa administrasyon ni Presidente Ferdinand Marcos Jr.
Photo Courtesy:PCO
